بھارتی وزیرخارجہ سشماسوراج ھارٹ آف ایشیا کانفرنس میں شرکت کرنے پاکستان پہنچ گئی
اسلام آباد: ہندوستان کی وزیر خارجہ سشما سوراج نئی دہلی میں تنقید کے باوجود پاکستان کے ساتھ متعدد معاملات پر بات چیت اور ’ہارٹ آف ایشیا ‘ کانفرنس میں حصہ لینے کیلئے منگل کی شام اسلام آباد پہنچ گئیں۔
انڈیا کی وزارت خارجہ کے ترجمان وکاس سواروپ نے گزشتہ روز ٹوئٹر پر بتایا تھا کہ سشما سوراج کی سربراہی میں انڈین وفد افغانستان پر بات چیت کرے گا۔
اسلام آباد پہنچنے کے بعد میڈیا سے مختصر ملاقات میں سشما نے کہا کہ وزیر اعظم نواز شریف اور مشیر خارجہ سے ملاقاتوں میں دونوں ملکوں کے درمیان تعلقات کی بہتری پر بات ہو گی.
انہوں نے ہارٹ آف ایشیا کانفرنس کو اہم قرار دیتے ہوئے کہا کہ وہ اسی غرض سے یہاں آئی ہیں.
پاکستانی وزیر اعظم کے مشیر خارجہ امور سرتاج عزیز کہتے ہیں کہ ہندوستانی وزیر سے بات چیت میں دونوں ملکوں کے درمیان جامع مذاکرات کی بحالی پر گفتگو ہو گی۔
آج پاکستانی وزیراعظم نے سارا دن افغان صدر اور بھارتی وزیرخارجہ کے دورہ پاکستان سے متعلق مشاورت میں گزارا اور ملاقاتوں کیلئے حکمت عملی طے کی گئی. اس کے علاوہ ھارٹ آف ایشیا کانفرنس کے ایجنڈے پر بھی غور کیا گیا.اجلاس میں وفاقی وزیر خزانہ اسحاق ڈار، وزیر داخلہ چوہدری نثار، سرتاج عزیز، قومی سلامتی کے مشیر لیفٹینٹ جنرل (ر) ناصر جنجوعہ، آرمی چیف جنرل راحیل شریف، ڈی جی آئی ایس آئی لیفٹیننٹ جنرل رضوان اختر بھی شریک ہوئے۔
دو روزہ ہارٹ آف ایشیا استبول-پراسیس کانفرنس میں پاکستان، افغانستان اور ہندوستان کے علاوہ چین، ایران، روس، ترکی، سعودی عرب، متحدہ عرب امارات، آذربائیجان، کرغزستان، قازخستان، تاجکستان اور ترکمانستان کے وزرائے خارجہ یا سینئر نمائندے شرکت کریں گے۔
خیال رہے کہ ہارٹ آف ایشیا کانفرنس کا قیام 2011 میں افغانستان اور ترکی کی کوششوں سےعمل میں آیا۔
Tags: India, Indian FM, Pakistan, sushma swaraj
